Zëvendësministri i Punëve të Jashtme i Rusisë, Mikhail Bogdanov, deklaroi se planet “e rrezikshme” të Izraelit për të aneksuar territoret palestineze mund të provokojnë pakënaqësi dhe dhunë të mëtejshme, duke rrezikuar perspektivën për një zgjidhje me dy shtete.
Në të ardhmen e afërt qeveria e re e koalicionit të Izraelit “mund të fillojë hapa praktike” për të zbatuar planet e saj të deklaruara për të aneksuar territoret palestineze.
“Ne besojmë se një zhvillim i tillë do të ishte shumë i rrezikshëm. Jemi dakord me vlerësimet dhe paralajmërimet në këtë drejtim, të cilat pasqyrohen në vendimet e fundit të Ligës Arabe për këtë çështje”, tha ai.
Liga Arabe e ka dënuar skemën si një “krim lufte”.
Duke folur për të përditshmen egjiptiane Al-Ahram, Bogdanov paralajmëroi: “Aneksimi i një pjese të territoreve palestineze nga Izraeli jo vetëm që do t’i jepte fund perspektivës së një zgjidhje dy-shtetesh, por me shumë mundësi do të provokonte një raund të ri dhune në Palestinë, si dhe do të ndezë më tej pakënaqësinë akute të rrugëve arabe”.
Rusia mbetet e angazhuar për një zgjidhje me dy shtete në bazë të ligjit ndërkombëtar dhe dëshiron të shohë bisedimet e drejtpërdrejta Izrael-Palestinë të nisura nën kujdesin e OKB-së, shtoi Bogdanov.
I inkurajuar nga e ashtuquajtura “Marrëveshja e Shekullit” të SHBA-ve, Izraeli pritet zyrtarisht të aneksojë disa pjesë të Bregut Perëndimor më 1 korrik, siç u dakordua ndërmjet kryeministrit Benjamin Netanyahu dhe Benny Gantz, kreu i partisë Blu dhe Bardhë.
Plani ka tërhequr dënimin dhe zemërimin ndërkombëtar.
Bregu Perëndimor, përfshirë Kudsin Lindor, shihet si territor i okupuar sipas ligjit ndërkombëtar, duke i bërë kështu të gjitha vendbanimet hebreje, si dhe aneksimin e planifikuar, të paligjshëm.