Java

Kryeministri i Shqipërisë, Edi Rama, po realizon një vizitë në Türkiye, ndërkohë është takuar me presidentin turk, Recep Tayyip Erdoğan, gjatë “TRT World Forum 2022”, raporton (AA).

“Në TRT World Forum, një platformë e njohur për cilësinë e debateve mbi axhendat globale dhe rajonale, e cila mbledh çdo vit në Stamboll politikëbërës e vendimmarrës të lartë”, ka shkruar Rama në rrjetet sociale në lidhje me vizitën.

Kryeministri Rama është takuar gjatë forumit me Presidentin e Republikës së Türkiye-s, Recep Tayyip Erdoğan.

Rama gjatë vizitës në Türkiye shoqërohet edhe nga zëvendëskryeministrja dhe ministrja e Infrastrukturës dhe Energjisë e Shqipërisë, Belinda Balluku dhe ministrja e Turizmit dhe Mjedisit, Mirela Kumbaro.

Një sulm islamofobik është kryer duke lënë një kopje të dëmtuar të Kuranit në afërsi të derës hyrëse të një xhamie në kryeqytetin e Suedisë, Stockholm.

Në një deklaratë nga llogaria e medias sociale të xhamisë në Stockholm thuhet se muslimanët janë fyer pasi kopja e Kuranit të shkatërruar është lidhur me zinxhir në hekurin e kopshtit në afërsi të derës së xhamisë.

“Xhamia dhe besimtarët tanë marrin kërcënime gjerësisht. Racistët për të njollosur ata që nuk janë prej tyre gjithmonë ndërmarrin një iniciativë të re. Po ndajmë këtë fotografi dhe informacione për të tërhequr vëmendjen e xhematit dhe të opinionit publik si dhe që krimi i urrejtjes të mos normalizohet”, thuhet në deklaratën ku paraqitet edhe fotografia lidhur me ngjarjen.

Edhe më parë në derën e xhamisë është vizatuar me bojë shumë herë kryqi nazist si dhe janë shkruar shkrime islamofobike.

Dita e shtetësisë së Bosnjës e Hercegovinës (BeH), 25 Nëntori, u shënua me vendosjen e luleve, këndimin e Fatihasë dhe nderimin e viktimave të gjenocidit në varrezat e Qendrës Memoriale të Srebrenicës, Potoçari.

Në përmendoren e varrezave, si në vitet e kaluara, u vendosën kurora me lule nga anëtarët e shoqatave të viktimave të gjenocidit, përfaqësues të komunës së Srebrenicës, Qendrës Përkujtimore të Srebrenicës, Potoçari, zyrtarë dhe përfaqësues organizatave, si dhe qytetarë të shumtë.

Shefket Hafizoviq, kryetar i Bordit të Drejtorëve të Qendrës Përkujtimore në Srebrenicë, Potoçari, në fjalimin e tij para të pranishmëve tha se kjo datë shënon një pikë kthese në historinë e vendit.

“Sot jemi këtu për të shënuar një ngjarje që shënoi një pikë kthese në historinë e BeH-së. Shumë njerëz nuk e kanë dashur ekzistencën e BeH-së, as atëherë dhe as tani. Në vitet 1990-ta, Bosnje e Hercegovina ishte viktimë e agresionit fillimisht nga Serbia dhe më vonë nga Kroacia, që rezultoi në gjenocid. Dhe 30 vjet më vonë, lufta për drejtësi dhe barazi të të gjithë qytetarëve të vendit tonë është motoja dhe synimi ynë dhe kështu do të mbetet”, tha Hafizoviq.

Hamdija Fejziq, nënkryetar i komunës së Srebrenicës, u dërgoi qytetarëve një mesazh urimi me rastin e 25 Nëntorit, Ditës së Shtetësisë së BeH-së.

“I uroj të gjithë qytetarët e Srebrenicës, mbarë Bosnje e Hercegovinës, si dhe diasporës, për Ditën e Shtetësisë së BeH-së. Atdheu është obligimi dhe betimi ynë për të cilin duhet të kujdesemi dhe detyrimi ynë për të ardhmen. Ne duhet ta mbrojmë Bosnje e Hercegovinën për hir të atyre që dhanë gjënë më të vlefshme, jetën e tyre, për hir të atyre që jetojnë sot dhe luftojnë për ta bërë vendin tonë më të bukur, si dhe për hir të brezave që do të vijnë. Detyra jonë është të ndërtojmë atdheun tonë. Rroftë përgjithmonë Bosnje e Hercegovina”, tha Fejziq.

Organizata humanitare “Catholic Relief” ka paralajmëruar se po përkeqësohet varfëria në Francë.

Sipas raportit vjetor të organizatës, 48 për qind e familjeve që kërkuan ndihmë nga organizata në vitin 2021 nuk kishin buxhet të mjaftueshëm për t’u ushqyer.

Pas pagesës së faturave dhe shpenzimeve të pashmangshme, gjysma e familjeve që kërkuan ndihmë kishin 295 euro në dispozicion për të përfunduar muajin. Kjo përfaqëson një bilanc prej më pak se 5 euro në ditë për person. Organizata vlerëson se nevoja minimale për ushqim ditor është 7 euro.

Rreth 75 për qind e përfituesve të ndihmës në organizatën “Catholic Relief” janë të rinj. Për shkak të krizës energjetike dhe rritjes së çmimeve në vitin 2022, organizata pret që situata të përkeqësohet.

“Këto familje tashmë po bëjnë gjithçka për të reduktuar konsumin e energjisë elektrike dhe gazit, si do ta menaxhojnë nëse çmimet do të rriten me 15 për qind vitin e ardhshëm?”, pyet Veronique Devise, presidentja e organizatës “Catholic Relief, teksa fliste për gazetën La Depeche.

Organizata bën thirrje për rritjen e përfitimeve minimale sociale në 40 për qind nga të ardhurat mesatare dhe përshtatjen e tyre me inflacionin.

Türkiye nuk pranon mesazhin e ngushëllimit nga SHBA-ja me rastin e sulmit të tmerrshëm terrorist të djeshëm në Istanbul, ka thënë sot ministri i Brendshëm turk, Suleyman Soylu.

Në shpërthimin që ndodhi në rrugën “Istiklal” të Istanbulit, i cili u krye nga organizata terroriste PKK/YPG, humbën jetën 6 persona ndërsa 81 të tjerë u plagosën.

Terroristja e arrestuar pranoi se urdhrin për sulm e ka marrë nga qendra e organizatës terroriste në Kobani të Sirisë. YPG është dega siriane e PKK-së, e cila është e listuar si organizatë terroriste nga Türkiye, SHBA-ja dhe Bashkimi Evropian.

Sekretarja për media e Shtëpisë së Bardhë, Karine Jean-Pierre, përmes një deklarate me shkrim tha se: “SHBA-ja dënon ashpër aktin e dhunës që ndodhi në Istanbul”.

Duke iu drejtuar gazetarëve nga vendi ku ndodhi shpërthimi, ministri i Brendshëm Soylu sot tha se personi përgjegjës për sulmin po të mos ishte kapur, sot do të ikte në Greqi. Ai shtoi se edhe personi që ka planifikuar sulmin po ashtu është arrestuar.

Ushtria ukrainase ka hyrë në qytetin jugor Kherson pas tërheqjes ruse nga rajoni.

Pamjet dhe fotografitë e postuara në mediat sociale tregojnë trupat e para ukrainase që arritën në sheshin qendror të qytetit Kherson.

Rajoni u pushtua nga forcat ruse në fillim të luftës që filloi në muajin shkurt të këtij viti.

Pamjet treguan trupat ukrainase duke ngritur flamurin e tyre kombëtar në zyrën e policisë në Kherson. Flamujt gjithashtu u ngritën në sheshin qendror jashtë një godine qeveritare, ndërkohë që banorët brohorisnin në mbështetje të ushtarëve ukrainas.

“Sot është një ditë e jashtëzakonshme. Rusët u larguan nga bregu i djathtë i Dnipros. Është një fitore e madhe e ushtrisë ukrainase dhe popullit ukrainas. Faleminderit të gjithë aleatëve dhe miqve tanë. Fitoret tona do të ishin të pamundura pa mbështetjen tuaj”, tha në rrjetin Telegram këshilltari i Ministrisë së Punëve të Brendshme të Ukrainës, Anton Garashchenko.

Sipas Ministrisë së Mbrojtjes së Rusisë, tërheqja e ushtrisë ruse nga qyteti Kherson në bregun lindor të lumit Dnipro të Ukrainës përfundoi herët në mëngjes.

“Asnjë njësi e vetme e pajisjeve ushtarake apo armatim nuk ka mbetur në bregun perëndimor. Të gjithë ushtarakët rusë kaluan në bregun e majtë të Dnipros”, thuhet në njoftimin e ministrisë ruse.

Në Gjermani po përjetohet një kthim drejt drurit si burim për ngrohje, ndërsa furnizuesit në gjithë vendin po raportojnë rritje të shitjeve pasi kostot e ngrohjes zmadhohen për shkak të shtrenjtimit të çmimeve të gazit dhe energjisë elektrike, transmeton Anadolu Agency.

Vitet e fundit, afërsisht gjysma e shtëpive të Gjermanisë ngroheshin me gaz natyror dhe 25 për qind përdornin naftë ngrohjeje, ndërsa më pak se 6 për qind dru zjarri.

Por tani furnizuesit e lëndës së parë kanë vështirësi t’i përmbushin kërkesat, gjë që ka çuar në një mungesë të drunjve të zjarrit. Në fillim të kësaj vere, Shoqata Federale e Drunjve të Zjarrit të Gjermanisë tha se tregu kishte shitur të gjitha furnizimet.

Heike, një gjermane e cila jeton me familjen e saj të re në Berlin, po ashtu ka kaluar në dru për ngrohje këtë dimër.

Përdorimi i gazit nuk është më efikas ekonomikisht, pasi çmimet pothuajse janë dyfishuar në të gjithë vendin.

Heike thotë se ka parë një rritje të numrit të njerëzve që përdorin pelet druri për ngrohje.

“Unë do të thosha se sistemet alternative të ngrohjes po bëhen gjithnjë e më të njohura tani, gjë që mund të nënkuptojë gjithashtu kthimin tek druri, i cili është një lloj burimi që po rritet vazhdimisht. Dhe edhe nëse e hiqni atë nga pylli, ai rirritet. Prandaj, mendoj se mund të jetë një alternativë”, shprehet Heike.

Druri për ngrohje është një plan rezervë në rast se Gjermanisë i mbaron gazi në dimër. Tashmë ekziston frika se gazi do të racionohet për përdorim industrial në dimër.

Kërkesa është aq e lartë, saqë shumica e furnizuesve kanë ndaluar marrjen e porosive në korrik për pjesën tjetër të vitit. Disa po përpiqen të rreshtojnë dërgesat për dimrin e ardhshëm edhe pse çmimi i drurit gjithashtu është dyfishuar, por mbetet shumë më i ulët se ai i sistemeve të ngrohjes me gaz ose elektrike.

Ndërsa furnizimi me dru po bëhet i vështirë, disa njerëz po shkojnë për prerje në pyjet pranë shtëpive të tyre, thotë Heike.

“Unë kam parë tashmë njerëz që shkojnë në pyll dhe presin dru atje për të ngrohur shtëpitë e tyre. Mendoj se kjo do të jetë e ardhmja jonë ose të paktën e ardhmja e afërt sepse ne nuk e dimë se sa do të vazhdojë kjo krizë dhe nëse sistemi i ngrohjes do të ndryshohet atëherë. Por edhe sigurimi i sistemeve më të reja të ngrohjes tani është vërtet i vështirë sepse askush nuk mund të furnizojë asgjë”, thekson ajo.

Ndërsa depozitat evropiane të gazit mbushen, çmimet vazhdojnë të bien në tregun “spot”, por konsumatorët gjermanë nuk po përfitojnë nga çmimet më të lira.

Gazi tregtohej me 350 euro për megavat-orë në gusht në bursën holandeze TTF, por ai ra në rreth 92 €/MWh të martën, prapëseprapë më shumë se dy herë më i lartë se vitin e kaluar.

Vetëm klientët e rinj do të kenë shanse të përfitojnë nga rënia aktuale e çmimeve, sipas ekspertëve të tregut. Konsumatorët ekzistues dhe të furnizimit bazë nuk mund të presin rënie të çmimeve.

Për konsumatorët në Gjermani, lufta është reale, dhe shumë njerëz tani po përgatiten për atë që është cilësuar si një dimër i ftohtë i errët.

“Kam dëgjuar nga shumë miq që po luftojnë me të njëjtin problem. Disa prej tyre janë të lumtur që kanë një furrë të cilën mund ta përdorin, ndërsa të tjerët jo dhe thjesht nuk dinë si ta menaxhojnë gjithë dimrin me sistemin që përdorin. Është me të vërtetë një luftë e madhe për të gjithë ne, dhe nuk e dimë se si do të jetë dimri. Do të jetë kohë e vështirë mendoj”, shtoi Heike.

Duke marshuar në Lyon, më shumë se 200 anëtarë të së djathtës ekstreme franceze të premten në mbrëmje i quajtën imigrantët “vrasës” dhe nuk u përballën me ndërhyrje të policisë, raporton (AA).

Duke tundur pankarta të mëdha të zeza ku shkruhej “Imigracioni vret” dhe “Drejtësi për Lolën” – duke iu referuar një vajze 12-vjeçare të vrarë në fillim të këtij muaji – protestuesit e ekstremit të djathtë përdorën bomba tymi dhe brohoritën parulla nxitëse si “imigrantë, vrasës”.

Marshit i parapriu një tubim të enjten mbrëma, organizuar nga Partia “Reconquête” e ekstremit të djathtë e Eric Zemmour-it, përpara një gjykate. Disa marshime të tjera u zhvilluan njëkohësisht në të gjithë Francën me thirrjen e lëvizjes së ekstremit të djathtë.

Pas zhdukjes më 14 tetor, trupi i pajetë i Lolës u gjet në një valixhe.

E dyshuara kryesore, Dahbia B., është një imigrante 24-vjeçare me histori të çrregullimeve psikiatrike, për të cilën kishte urdhër të largohej nga Franca pas tejkalimit të vizës.

Vdekja dhe faji i mundshëm i imigrantes, ka bërë që disa politikanë të ekstremit të djathtë të akuzojnë imigrantët në përgjithësi si kriminelë dhe të kërkojnë dëbime masive.

Një javë pas vrasjes së saj, familja e Lolës kërkoi që çdo përdorim i emrit ose imazhit të saj “për qëllime politike të ndërpritet menjëherë”, në mënyrë që ata të mund ta vajtojnë atë me “qetësi, respekt dhe dinjitet”.

Ministri i Shëndetësisë së Gjermanisë, Karl Lauterbach tha se spitalet në vend ndodhen përballë rrezikut të falimentimin për shkak të krizës energjetike dhe inflacionit, transmeton (AA).

Në një deklaratë në programin “Bericht aus Berlin” të transmetuar në kanalin parë televiziv gjerman ARD, ministri Lauterbach vuri në dukje se spitalet në muajt e ardhshëm do të përjetojnë problem të likuiditetit financiar dhe se ky problem duhet të zgjidhet.

“Është e qartë se spitalet janë në një situatë shumë të veçantë. Do të ketë mbyllje nëse nuk tregojmë reaksion të shpejtë dhe me të vërtetë efektiv këtu”, deklaroi Lauterbach i cili shtoi se të martën më 18 tetor do të bisedojë me ministrin e Financave, Christian Lindner që ndaj spitaleve të jepet më shumë ndihmë shtetërore.

Ai tha se e sheh si negative ndarjen e fondit të veçantë për spitalet. “Nuk mund të formojmë fond të veçantë për çdo fushë”, tha Lauterbach.

Unioni i Spitaleve të Gjermanisë në një deklaratë muajin tetor tha se 40 për qind e spitaleve në vend ndodhen në prag të falimentimit për shkak se rritja ekstreme e çmimeve të energjisë dhe inflacioni e kanë bërë të pamundur vazhdimin e aktiviteteve të spitaleve.

Kreu i Unionit të Spitaleve, Gerald Gass tha se klinikat nuk do të mund të përballojnë kostot në rritje dhe se disa do të detyrohen të mbyllen në muajt e ardhshëm. Gass paralajmëroi se situata mund të përkeqësohet edhe më tej në vitin e ardhshëm.

Franca ka marrë vendim për të tërhequr ushtarët e saj nga Republika e Afrikës Qendrore.

Në një deklaratë nga ambasada e Francës në Republikën e Afrikës Qendrore thuhet se së shpejti do të tërhiqet njësia e fundit ushtarake e cila është e vendosur në aeroportin Bangui-MPoko në kryeqytetin Bangui.

Në deklaratën ku nuk jepet informacion lidhur me datën e tërheqjes, thuhet se autoritetet franceze dhe të Afrikës Qendrore kanë rënë dakord për çështjet teknike.

Presidenti i Francës, Emmanuel Macron më 17-18 shkurt njoftoi se do të tërheqin ushtarët e tyre në Mali brenda 4-6 muajve.

Në gusht 2022 Franca tërhoqi 2.400 ushtarë të saj dhe tre baza që ndodheshin në Mali në kuadër të operacionit “Barkhane” dhe më pas i vendosi ato në vendin fqinj Niger.