Në një telefonatë, presidenti rus Vladimir Putin i tha homologut të tij francez Emmanuel Macron se objektivat e “operacionit ushtarak” të Rusisë në Ukrainë do të “arrihen pavarësisht se çfarë do të ndodhë”, thuhet në një deklaratë të Kremlinit.
“U vu re se gjatë operacionit special për mbrojtjen e Donbasit, Rusia synon të vazhdojë luftën pa kompromis kundër militantëve të formacioneve të armatosura nacionaliste që kryejnë krime lufte, duke përfshirë vendosjen e pajisjeve ushtarake në zonat e banuara dhe përdorimin e civilëve si mburoja njerëzore”, thuhet në deklaratë.
Putin e ka akuzuar Francën se nuk ka bërë “absolutisht asgjë” për të detyruar Kievin të zbatojë kushtet e Marrëveshjes së Minskut.
“Përveç kësaj, gjenocidi afatgjatë kundër civilëve të Donbasit, i cili çoi në viktima të shumta njerëzore dhe detyroi qindra mijëra njerëz të kërkonin strehim në Rusi, po shpërfillet”, thuhet në deklaratë.
Presidenti rus, thuhet në deklaratë, përshkroi kushtet e Rusisë në negociatat me përfaqësuesit e Ukrainës dhe tha se Moska kërkon çmilitarizimin dhe statusin neutral të Ukrainës.
“U theksua se detyrat e operacionit special ushtarak do të arrihen pavarësisht rrethanave, dhe përpjekjet për të fituar kohë duke vonuar negociatat do të çojnë vetëm në faktin se kërkesa shtesë për Kievin do të shfaqen në pozicionin negociator të Rusisë”, thuhet në deklaratë.
Duke i përshkruar si “dezinformim” raportimet që thonë se Rusia po shënjestron Kievin dhe qytetet e tjera me sulme raketore, Putin tha se forcat e armatosura ruse “po përdorin armë me precizitet të lartë dhe po shkatërrojnë vetëm infrastrukturën ushtarake”.
Udhëheqësi rus shprehu gjithashtu gatishmërinë për të bashkëpunuar “me partnerët e huaj” për të siguruar evakuimin e sigurt të shtetasve të huaj nga territori i Ukrainës.