Me rastin e festave të Pashkëve ortodokse, Zjarri i Shenjtë nga varri Krishtit në Jerusalem është sjell edhe sivjet në tempujt ortodoks në Kosovë. Ky zjarr i shenjtë sot ka arritur në Manastirin e Graçanicës, ku është pritur nga Peshkopi i Rashkës dhe Prizrenit, Teodosije dhe disa qindra besimtarë.
Zjarrin në Manastirin e Graçanicës e kanë sjell përfaqësuesit e Kishës Ortodokse Serbe dhe ndihmësi i Zyrës për Kosovën në Qeverinë e Serbisë, Dushan Jovoviq. Zjarri i shenjtë konsiderohet si mrekullia më e madhe në Jerusalem, sepse çdo vit, në prag të pashkëve, me rastin e lutjeve të Peshkopit të Jerusalemit dhe Palestinës, Teofilit, në Kishën e Ringjalljes së Krishtit në Jerusalem, zjarri konsiderohet se ndizet vetvetiu.
Zjarri i Shenjtë nga Jerusalemi, pas Graçanicës, është dërguar edhe në Patriarkanën e Pejës dhe Manastirin e Deçanit. Ndërkohë, nesër do të dërgohet në Manastirin e Banjskës në veri të Kosovës. Përndryshe, delegacioni zyrtarë i Kishës Ortodokse Serbe (KOS) ka marr pjesë në ceremoninë e paraqitjes së Zjarrit të Shenjtë në Kishën e Krishtit në Jerusalem. Nga aty, prijësit e KOS-it e kanë bartur zjarrin në tempullin e Savës së Shenjtë (Sveti Sava) në Beograd, prej nga është përcjell në Kosovë.
Kjo ceremoni e bartjes së zjarrit të shenjtë nga Jerusalemi në Beograd dhe pastaj në Kosovë, për herë të parë është mbajtur vitin e kaluar.