Prokuroria Themelore në Prizren, njoftoi se ka pranuar të përkthyer në gjuhen shqipe raportin prej 58 faqesh të ekspertizës së Institutit të Mjekësisë Ligjore në Lozanë të Zvicrës për rastin e Astrit Deharit.
Sipas një njoftimi për media nga Prokuroria, raporti i njëjtë në gjuhën frënge dhe në gjuhën shqipe i është dorëzuar të enjten familjes Dehari dhe përfaqësuesit të tyre ligjor, avokatit Tomë Gashi.
Siç e citon kjo Prokurori ekspertizën e Institutit të Mjekësisë Ligjore e cila gjendet në Lozanë të Zvicrës, lidhur me rastin e Astrit Deharit, ka “dyshime që lidhen me rrethanat e vdekjes”.
“Në fakt hipoteza e një vetëvrasjeje e z. DEHARI Astrit përmes mjeteve të caktuara nga mjekët ligjor duket pak e vërtetë dhe intervenimi i një personi të tretë në proces fatal duhet të kihet parasysh”, shkruan aty.
Gjithashtu Instituti i Mjekësisë Ligjore i Lozanës, siç njofton Prokuroria, bën të ditur se “analizat e ADN-së të kryera në laboratorët tona kanë mundësuar të vejnë në dritë një profil të ADN-së mbi mostrën e përshkruar nga ekspertët e Kosovës siç thuhet se përmban pak ose shumë pak ADN”.
Ndërsa pika e tretë e kësaj ekspertize vlerëson se “një hetim i ri është i nevojshëm për t’i qartësuar rrethanat e vdekjes. Ndërsa për këtë, më poshtë thuhet se “ekipet tona dhe laboratorët tona janë në dispozicion të hetuesve të ngarkuar me çështjen”.
Prokuroria thekson se bazuar në të gjeturat e raportit në fjalë, do të vazhdohet hetimi i këtij rasti dhe do të ndërmerren të gjitha veprimet e nevojshme, përfshirë ekspertët në Lozanë dhe ata nga Instituti i Mjekësisë Ligjore të Kosovës.
“Për sqarimin e raporteve të tyre dhe nëse është e domosdoshme do të bëhet një super-ekspertizë jashtë vendit në bashkëpunim dhe koordinim me partnerët ndërkombëtarë në mënyrë që të sqarohen rrethanat dhe shkaktarët e vdekjes”, thotë Prokuroria.
Në fund të komunikatës thuhet se “Prokurori i Shtetit siguron familjen Dehari dhe opinionin publik se në bazë të kompetencave dhe autorizimeve kushtetuese dhe ligjore do të zhvilloj hetime profesionale deri në zbardhjen e plotë të këtij rasti”.
Aktivisti i Lëvizjes Vetëvendosje, Astrit Dehari, u gjet i vdekur në një qeli të burgut në Prizren më 5 nëntor 2016 dhe pas një autopsie dhe një hetimi, Kryeprokurori i Përgjithshëm i Prizrenit Syle Hoxha atëherë raportoi rastin si vetëvrasje.
Dehari u arrestua me dyshimin se ai së bashku me disa anëtarë të tjerë të Lëvizjes Vetëvendosje hodhën një bombë në Kuvendin e Kosovës në gusht të vitit 2016 për të parandaluar marrëveshjen e demarkacionit të kufirit me Malin e Zi.
Në maj të vitit 2018, Zyra e Prokurorit të Shtetit të Kosovës dërgoi çështjen e Astrit Dehari në Institutin e Mjekësisë Ligjore në Lozanë pas shumë presionesh nga familja Dehari, Lëvizja Vetëvendosje dhe publiku kosovar, i cili këmbënguli për një hetim të pavarur.