Policia e Kosovës në bashkëpunim me institucionet e inteligjencës ka zhvilluar bastisje në një bazë të armatimit në veriun e vendit.
Ministri i Punëve të Brendshme i Kosovës, Xhelal Sveçla, tha se bastisja ka ndodhur në një shtëpi në Komunën e Zveçanit të banuar me shumicë nga komuniteti serb.
“Kjo shtëpi është përdorur për grumbullim dhe shpërndarje të armatimit për grupet kriminale serbe. Deri më tani është zbuluar një sasi e madhe e armatimit, duke përfshirë armë automatike, fishekë, granata dore dhe eksploziv. Në vendin e ngjarjes, përveç institucioneve të sigurisë, kanë qenë të pranishëm edhe përfaqësues të KFOR-it”, theksoi Sveçla.
Ai tha se veriu i Kosovës hap pas hapi po shkon drejt normalitetit, ndërsa rendi dhe ligji nuk do të cenohet në asnjë cep të vendit.
Tutje, ministri kosovar tha se për dy dekada, veriu i Kosovës ka jetuar në ilegalitet, në një rend anormal, ku kanë gjetur strehë organizatat kriminale e kriminelët e financuar nga Beogradi.
“Kontrabandimi, hyrja ilegalisht e mallrave e armëve në Kosovë, ka prodhuar situatë shqetësuese edhe për qytetarët tanë në veri, të cilët të përballur me fuqinë e kriminelëve, kanë jetuar nën shantazh e presion të vazhdueshëm”, shtoi Sveçla.