Sipas Agjencisë Qendrore Koreane të Lajmeve (KCNA) në takimin e Komisionit Ushtarak të Partisë Punës së Koresë të kryesuar nga Kim, u shqyrtua përgatitja e ushtrisë për luftë dhe planet e sulmit “kundër armiqve”.
Pas bisedimeve për rritjen e njësive kufitare, kryerjen e stërvitjeve luftarake të vërteta dhe zhvillimin e armëve dhe strategjive të reja, Kim urdhëroi ushtrinë për finalizimin e planeve të saj luftarake dhe nënshkroi një dekret lidhur me “zbatimin e masave të rëndësishme ushtarake”.
“Ushtria duhet të posedojë armë më të fuqishme sulmuese dhe t’i pozicionojë menjëherë këto armë”, tha Kim i cili dha urdhër për prodhimin në shkallë të gjerë të armëve dhe sistemeve të ndryshme.
Në pamjet e publikuara nga KCNA thuhet se Kim gjatë takimit tregoi mbi hartën e Gadishullit Korean disa pika në kryeqytetin koreanojugor Seul dhe përreth tij të cilat strehojnë gjysmë e popullsisë së Koresë së Jugut dhe në të cilat ndodhet qendra e ushtrisë.
Paralajmërimet e fundit të Kim vijnë pasi SHBA-ja muajin e kaluar dërgoi një nëndetëse me energji bërthamore në Korenë e Jugut për herë të parë që nga viti 1981.
Në vazhdën e rritjes së tensioneve në javët e fundit, Pheniani ka kryer lëshime testuese të raketave ndërsa Koreja e Jugut zhvilloi stërvitje të përbashkëta ushtarake me SHBA-në dhe Japoninë.