Presidenti amerikan, Donald Trump, ka deklaruar se SHBA-ja ka arritur një marrëveshje me Danimarkën dhe Grenlandën, e cila i jep Washingtonit kontroll të përhershëm mbi sigurinë në Grenlandë, pa asnjë kosto për SHBA-në.
Trump në një postim në platformën e tij Truth Social tha se marrëveshja adreson “të gjitha shqetësimet tona të shumta të SHBA-së”.
“Kjo është një marrëveshje ‘me afat të pakufizuar’, nuk ka fund. Jemi shumë të nderuar dhe krenarë për atë që sapo ka ndodhur dhe gjithçka për të cilën u ra dakord sot do të çmohet nga populli amerikan. Ne do të fillojmë menjëherë procesin e zhvillimit të një pranie të madhe ushtarake në pjesën e përshtatshme të Grenlandës, prej të cilave ka shumë. Do të punojmë me popullin e Grenlandës për zhvillimin dhe ndërtimin e saj”, tha Trump.
“Asnjë kundërshtar i SHBA-së nuk mund të ketë kurrë një bazë në Grenlandë, të ketë prani ushtarake në Grenlandë apo të bëjë investime të ndjeshme në Grenlandë pa miratimin tonë të shprehur me shkrim”, shtoi ai.
“Nuk do të ketë asnjë kosto për SHBA-në. Me udhëzimin tim, ne punuam me përfaqësuesit e Danimarkës dhe Grenlandës për të garantuar se SHBA-ja do të kenë përgjithmonë aftësinë e plotë për të bërë atë që është e nevojshme në Grenlandë, me qëllim garantimin dhe mbrojtjen e sigurisë së Grenlandës dhe të SHBA-së”, tha ai.
Duke iu referuar rëndësisë strategjike të ishullit, Trump tha: “Për më shumë se 100 vjet, presidentët e kanë ditur rëndësinë strategjike të Grenlandës, por asnjëri prej tyre nuk ishte në gjendje të bënte diçka për këtë. Jam krenar që jam presidenti që e trajtoi në mënyrë të përhershme dhe përfundimtare këtë çështje shumë të rëndësishme”.
Duke argumentuar se marrëveshja është në dobi të të gjitha palëve të përfshira, ai tha: “Mezi presim të punojmë me popullin e mrekullueshëm të Danimarkës dhe Grenlandës drejt një të ardhmeje madhështore në lidhje me këtë territor të madh dhe me rëndësi të lartë strategjike. Do të kujdesemi shumë për të”.
“Kjo është një ëndërr e bërë realitet për SHBA-në, diçka shumë e rëndësishme, historike dhe e veçantë”, tha Trump.
Presidenti amerikan më herët ka bërë thirrje për kontrollin e Grenlandës nga SHBA-ja, duke argumentuar se kjo është një domosdoshmëri historike dhe strategjike. Megjithatë, udhëheqësit danezë dhe grenlandezë e kishin kundërshtuar fuqishëm propozimin, duke këmbëngulur se Grenlanda “nuk është në shitje”.