Zëvendëspresidenti kinez të shtunën shprehu kundërshtimin e Pekinit ndaj “veprimeve ushtarake të njëanshme” në kuadër të konfliktit në vazhdim mes SHBA-së dhe Iranit, ndërsa në fjalimin e tij në Asamblenë e Përgjithshme të OKB-së bëri thirrje gjithashtu për një zgjidhje me dy shtete për çështjen palestineze, raporton AA.
“Duhet t’i zgjidhim dallimet dhe mosmarrëveshjet përmes dialogut dhe konsultimeve dhe të kundërshtojmë veprimet ushtarake të njëanshme që shkelin Kartën e OKB-së dhe anashkalojnë autorizimin e Këshillit të Sigurimit”, tha Han Zheng, duke u bërë thirrje vendeve të mëdha të marrin përsipër “përgjegjësi të veçanta për ruajtjen e paqes dhe sigurisë ndërkombëtare” dhe të jenë shembull duke “respektuar rregullat, mbështetur sundimin e ligjit dhe bërë atë që është e drejtë”.
Ai tha gjithashtu se Kina beson se sovraniteti dhe siguria e vendeve të Lindjes së Mesme, përfshirë shtetet e Gjirit, duhet të respektohen.
“Zinxhirët ndërkombëtarë të industrisë dhe furnizimit duhet të mbahen të qëndrueshëm dhe të papenguar, ndërsa tregtia globale duhet të mbrohet”, tha Han.
Ai bëri thirrje për avancimin e qeverisjes në Bregun Perëndimor dhe rindërtimin e Gazës pas konfliktit, në përputhje me parimin që palestinezët të qeverisin Palestinën.
Kina gjithashtu bën thirrje për “rikthimin e çështjes palestineze sa më shpejt në rrugën e duhur drejt zgjidhjes me dy shtete”, tha ai.
Lidhur me Ukrainën, ai tha se Kina vazhdon të luajë “rol konstruktiv në mënyrën e vet” për arritjen e një zgjidhjeje politike të krizës, ndërsa i bëri thirrje gjithashtu “vendit përkatës të ndalojë menjëherë përdorimin e kërcënimit të forcës ndaj Kubës dhe të heqë menjëherë dhe plotësisht bllokadën dhe sanksionet ndaj Kubës”.