Presidenti ukrainas Volodymyr Zelenskyy tha sot se Ukraina është gati të ngrijë konfliktin përgjatë vijës aktuale të frontit dhe të kalojë në negociata diplomatike si pjesë e përpjekjeve për t’i dhënë fund luftës me Rusinë.
Duke folur në një intervistë me kanalin televiziv amerikan “FoxNews”, Zelenskyy tha se Kievi më pas planifikon të vazhdojë të kërkojë garanci sigurie nga SHBA-ja dhe vendet evropiane. “Po. Tani për tani duhet të ngrijmë dhe mendoj se kjo është mënyrë reale për t’i dhënë fund kësaj lufte”, tha ai duke shtuar se një armëpushim do të jetë minimumi që Ukraina pret nga Rusia.
Ai tha se Kievi më pas do t’i drejtohet presidentit amerikan dhe udhëheqësve evropianë për të kërkuar garanci sigurie, duke theksuar se paqja dhe siguria janë prioritetet më të rëndësishme.
I pyetur nëse Ukraina do të pranojë të dorëzojë rajonin e Donbasit në këmbim të përfundimit të luftës, Zelenskyy hodhi poshtë sugjerimin se Rusia po fiton në fushën e betejës, duke thënë se Moska po kërkon të bëjë presion mbi Kievin që të tërhiqet nga territori i saj.
“Në vitin 2026, ata nuk patën sukses. Ata nuk po fitojnë në fushën e betejës”, pohoi ai. Zelenskyy pranoi se ukrainasit janë të lodhur nga lufta, por tha se vendi nuk mund ta braktisë thjesht tokën e tij. Ai përsëriti se negociatat duhet të fillojnë nga pozicionet aktuale në fushën e betejës, me një plan paqeje që do të zhvillohet përmes diplomacisë.
Presidenti ukrainas e përshkroi si “produktiv” takimin e tij me të dërguarin special të SHBA-së, Steve Witkoff, një ditë më parë në Oslo të Norvegjisë. Ai falënderoi kryeministrin norvegjez për mikpritjen e bisedimeve, në të cilat morën pjesë edhe udhëheqës evropianë dhe zyrtarë amerikanë, përfshirë Jared Kushnerin, i cili u bashkua nga distanca.
Sipas tij, se diskutimet u përqendruan në hapat e mundshëm drejt paqes dhe shprehu shpresën se takimi i Witkoff në Rusi do të japë reagime. Ai tha se hapat e mundshëm fillestarë drejt deeskalimit mund të përfshijnë armëpushime që mbulojnë sigurinë ushqimore, aktivitetin detar dhe infrastrukturën energjetike.
Zelenskyy tha se ka mbështetur menjëherë idenë e një armëpushimi energjetik të ngritur nga presidenti i SHBA-së, Donald Trump. “Shpresoj që sot, pas disa orësh, do të kemi disa rezultate”, shtoi ai.