ELEGJI E PUTHJES
Miliona sy na panë
Edhe pse nuk u trembëm kurrë
Kur mbi ne, gjethet ranë
E puthjet tona visheshin me nurë
Nga inati, filloi të bjerë shi
Kur puthja jonë, vazhdoi përsëri
Të shtrirë në barë mbetem, unë dhe ti
Dhe ata, që donin të kishin dashuri
KUR DASHURIA FLET
Mbrëmë, me një puthje i shtera burimet
Etjes i thashë ik, do të rrugëtoj
Me dashuri të lulëzoj tokën, ku banojnë gëzimet
Në pëllëmbë ma dha botën, dashuria për liri
Me një përqafim linda një jetë, e pagëzova trim
Që nesër të mbetet, më i miri ushtar i vendit tim
PËR TY ALEPPO
Me dashurinë e fisnikërisë, i lutem vetëm Zotit
Për ty Aleppo
Që mbi lëkurë të shtatit të ranë ligësitë e motit
Dalë nga urit e syve që nuk ngopen dot me dhe
As me gjak lehonash
Që pikturojnë jetët kohën ta pagëzojnë ishim ne
Aleppo që u bëre hi mes syve që lirinë e kanë gurrë
Deri tek fillimi i përjetësisë
Ku shtatët na ringjallen të qëndisura përplot nurë
Të rreshtuar para Perëndisë
Me ngjyrat e këtij moti që djallet duan t’i sosin sot
Për inatet e lumturisë
Që mbeten nishane syve të nënave më shumë se lot
PRANË MË KE
Kot mundohesh, rrugëve të më kërkosh
Symbyllas i frikësuar se nuk më ke
Shiko, shiko se atje përsëri do të më takosh
Mu aty tek lumi, të dua ku më the