Themeluesi i kompanisë së teknologjisë Microsoft, Bill Gates dyshohet se ka dhënë dorëheqjen për shkak të një hetimi të filluar nga Bordi i drejtorëve të kompanisë, pas zërave se ai kishte një lidhje me një punonjëse të kompanisë.
Microsoft në një deklaratë nëpërmjet email-it për agjencinë Associated Press njoftoi se ishte nisur një hetim nga Bordi i drejtorëve të kompanisë pasi një grua tha se ajo ka qenë në një marrëdhënie me ish-shefin ekzekutiv të kompanisë (CEO) Bill Gates që nga viti 2000.
Po ashtu thuhet se punonjësja tregoi rastin në fund të vitit 2019 dhe Microsoft mori ndihmë nga një kompani ligjore për një hetim të hollësishëm.
Disa burime thonë se ishte thelbësore në dorëheqjen e Gates që anëtarët e Bordit të Drejtorëve të Microsoftit, si pjesë e hetimit, gjetën se marrëdhëniet e Gates me punonjësen e kompanisë ishin të papërshtatshme dhe vendosën që ai të largohej nga Bordi i drejtorëve.
Një burim që bëri një deklaratë në emër të Gates argumentoi se marrëdhënia gati 20-vjeçare midis punonjëses dhe Gates përfundoi miqësisht dhe dorëheqja e ish-drejtorit ekzekutiv të Microsoftit nga Bordi i drejtorëve nuk kishte të bënte me këtë çështje.
Bill Gates në vitin 2020 njoftoi se po linte punën e tij në Microsoft për t’u përqendruar në aktivitetet filantropike.
Vendimi për divorc i Bill Gates dhe gruas së tij Melinda Gates
Themeluesi i Microsoftit, miliarderi amerikan Bill Gates dhe gruaja e tij Melinda Gates njoftuan në Twitter këtë muaj se kanë vendosur t’i japin fund martesës së tyre 27-vjeçare.
Gates tha se ata rritën 3 fëmijë gjatë gjithë martesës së tyre, ndihmuan njerëzit të bëjnë jetë të shëndetshme dhe produktive me fondacionin që themeluan në të gjithë botën dhe se këto misione do të vazhdojnë. “Megjithatë, ne nuk mendojmë se mund të rritemi së bashku si çift në fazën tjetër të jetës sonë”, tha ai.