Koreja e Veriut lëshoi një raketë balistike që “duket se ka fluturuar mbi Japoni”, raportuan mediat lokale duke cituar qeverinë japoneze, gjë që paraqet herën e parë pas pesë viteve që përshkohet një trajektore e tillë.
“Ministria e Mbrojtjes tha se ajo që duket të jetë një raketë balistike tashmë ka rënë”, raportoi agjencia e lajmeve Kyodo.
Më herët, Japonia tha se Koreja e Veriut lëshoi “atë që duket të jetë një raketë balistike”, e cila mund të jetë drejtuar drejt vendit, duke paralajmëruar njerëzit të kërkojnë strehim.
Qeveria japoneze tha se raketa “mund të fluturojë në drejtim të prefekturave Aomori dhe Hokkaido në Japoninë veriore”, raportoi transmetuesi publik NHK.
Kryeministri japonez Fumio Kishida “dënoi ashpër aktin dhe urdhëroi administratën e tij të mbledhë informacion dhe të bashkëpunojë me aleatët”, raportoi NHK.
Kyodo gjithashtu raportoi, duke cituar ushtrinë e Koresë së Jugut, se Pheniani ka gjuajtur një raketë në drejtim të lindjes.
“Lansimi i fundit i raketës është i pesti i këtij lloji në dhjetë ditë”, shtoi agjencia japoneze e lajmeve.
Të shtunën e kaluar, Koreja e Veriut lëshoi dy raketa balistike me rreze të shkurtër veprimi në Detin Lindor, duke bërë “provokimin” e katërt të tillë në më pak se një javë, tha ushtria e Koresë së Jugut.
Përshkallëzimi i tensioneve në Korenë e Veriut mendohet të jetë në përgjigje të Ditës së Forcave të Armatosura të Koresë së Jugut që po shënohet sot, si dhe ndaj një stërvitjeje ushtarake nga Jugu, SHBA-ja dhe Japonia në Detin Lindor.
Të enjten e kaluar, nënpresidentja amerikane Kamala Harris, gjatë një vizite njëditore në Korenë e Jugut, tha se SHBA-ja do të bëjë “çdo gjë” në fuqinë e saj për të siguruar angazhimin e saj të sigurisë ndaj aleatit të saj aziatik.