Tregtia e jashtme e Kinës në pesë muajt e parë të vitit 2021 është rritur me 28,2 për qind, krahasuar me të njëjtën periudhë të vitit të kaluar, tha Administrata e Përgjithshme e Doganave të këtij vendi.
Vëllimi i tregtisë së jashtme u zgjerua në 14,7 trilionë juanë (2,3 trilionë dollarë) në periudhën janar-maj. Ndërsa eksportet fituan 30,1 për qind për të shkuar në rreth 8 trilionë juanë (1,2 trilion dollarë), importet u rritën me 25,9 për qind në afërsisht 6,7 trilionë juanë (1 trilion dollarë) në nivel vjetor.
Bilanci i përgjithshëm pozitiv tregtar i Kinës është rritur 56,2 për qind në 1,3 trilion juanë (0.2 trilionë dollarë) gjatë kësaj periudhe.
Produktet me intensitet të fuqisë punëtore kapën pikën kryesore gjatë periudhës janar-maj, pasi eksportet e automobilave u rritën me 95,8 për qind në 75,6 miliardë juanë (11,8 miliardë dollarë) dhe telefonat celularë u rritën me 28,8 për qind në 354,8 miliardë juanë (55,5 miliardë dollarë).
Shifrat pozitive vijnë pavarësisht se pandemia e koronavirusit ka ndikim negativ në ekonominë globale dhe Kina vazhdon luftën e saj tregtare me SHBA-në.
Bilanci pozitiv tregtar i Kinës me SHBA-në qëndroi në 860,5 miliardë juanë (134,5 miliardë dollarë) në pesë muajt e parë të vitit, që ishte në rritje prej 34,1 për qind krahasuar me të njëjtën periudhë të vitit të kaluar.
Eksportet kineze në SHBA u rritën 38,9 për qind dhe importet u rritën 48,5 për qind gjatë kësaj periudhe.