Java

Izraeli njoftoi se po punonte për të parandaluar protestën pasi policia suedeze lejoi një grua rreth të 50-tave të digjte Torën përpara Ambasadës izraelite në Stokholm.

Në një deklaratë me shkrim nga Ministria e Jashtme izraelite, ministri i Jashtëm Eli Cohen ka zhvilluar telefonatë me homologun e tij suedez, Tobias Billström, për të parandaluar protestën. Gjatë bisedës, Cohen tha se akti i djegies së Torës në Suedi “mund të dëmtojë seriozisht marrëdhëniet mes dy vendeve”.

Duke shprehur tronditjen e tij për njoftimin se një akt në formën e djegies së Torës do të ndodhë në Suedi, Cohen i tha homologut të tij suedez se “duhet të përfundojë kërcënimi i dëmtimit të librave të shenjtë”.

Cohen nënvizoi se presin që qeveria suedeze “të parandalojë këtë veprim që mund të dëmtojë marrëdhëniet mes dy vendeve”.

Televizioni shtetëror suedez SVT njoftoi se një grua rreth të 50-ave kishte marrë leje nga policia për të djegur sot Torën përpara ambasadës izraelite në Stokholm. Policia tha se në aksion përveç gruas do të merrnin pjesë edhe tre persona të tjerë.

Në Suedi, muslimani sirian Ahmed Allush mori lejen për të djegur Biblën dhe Torën përpara Ambasadës së Izraelit në Stokholm më 15 korrik, por ai nuk dogji Biblën dhe Teuratin, duke shprehur respektin e tij për librat e shenjtë.

Allush tha se këtë përpjekje e ka bërë për të tërhequr vëmendjen që asnjë libër i shenjtë të mos digjet.

Ndërsa miliona njerëz në hemisferën veriore po përballen me temperatura rekord, OKB-ja lëshoi një paralajmërim sot se valë të nxehta gjithnjë e më të forta mund të jenë duke ardhur.

“Po shohim rritje të vazhdueshme në frekuencën, kohëzgjatjen dhe intensitetin e valëve të të nxehtit”, tha John Nairn, këshilltar i lartë për temperaturat e larta pranë Organizatës Botërore Meteorologjike (WMO).

“Këto ngjarje do të vazhdojnë të rriten në intensitet dhe bota duhet të përgatitet për valë të nxehta më intensive”, tha Nairn në një konferencë të OKB-së në Gjenevë.

Për vdekjet nga nxehtësia, ai tha se një studim i fundit llogarit se në Evropë, verën e kaluar pati 60.000 vdekje shtesë për shkak të nxehtësisë ekstreme.

Ai theksoi se Evropa ka “disa nga sistemet më të forta në botë të paralajmërimit të hershëm dhe planet e veprimit për shëndetin gjatë temperaturave të larta”.

Nairn tha se rritja e valëve të njëkohshme të të nxehtit rreth hemisferës veriore është rritur gjashtëfish që nga vitet 1980, pa asnjë shenjë rënieje.

Aktualisht, korriku dhe gushti janë muajt më kritikë për valët ekstreme të të nxehtit, shtoi ai.

WMO-ja tha të hënën se temperatura të reja rekord mund të regjistrohen pasi valët intensive të të nxehtit po përfshijnë SHBA-në jugore, Mesdheun, Afrikën e Veriut, Lindjen e Mesme dhe disa vende në Azi.

Muslimani sirian Ahmet Allush i cili mori leje nga policia e Suedisë për të djegur Teuratin dhe Ungjillin para ambasadës së Izraelit në Stockholm, nuk i dogji librat e shenjtë në fjalë si reagim ndaj provokimeve për djegien e Kuranit në vend.

Allush mbërriti para ambasadës për të kryer veprimin dhe në një deklaratë për gazetarët ai tha se ka marrë leje për të kryer këtë veprim, por me qëllimin për të tërhequr vëmendjen se nuk duhet të digjet asnjë libër i shenjtë.

“Unë jam musliman dhe nuk mund t’i djeg librat e shenjtë dhe fetarë”, tha Allush.

Ai vuri në dukje edhe provokimet për djegien e Kuranit nën mbrojtjen e policisë në Suedi. “Ka dallim mes lirisë së shprehjes dhe fyerjes së grupeve etnike. Djegia e Kuranit dhe librave të tjerë fetarë duhet të jetë krim urrejtjeje. Për të tërhequr vëmendjen mbi këtë kam marrë leje nga policia për të djegur Ungjillin dhe Teuratin. Kategorikisht nuk kam për qëllim djegien e ndonjë libri fetar”, tha Allush.

– Provokimet e djegies së Kuranit në Suedi

Rasmus Paludan, në vitin 2022 gjatë pushimeve të Pashkëve vazhdoi provokimet e tij për djegien e Kuranit në Malmö, Norköpin, Jönköping dhe kryeqytetin e Suedisë, Stockholm.

Edhe protestuesit dogjën goma në rrugë dhe sulmuan policinë me gurë duke kërkuar ndalimin e Paludan-it. Në ngjarjet e shënuara u plagosën 104 policë dhe 14 protestues, ndërsa u shkatërruan duke u djegur 20 automjete të policisë.

Më 21 janar Paludan dogji Kuranin para ambasadës së Türkiye-s në Stockholm. Gjatë veprimit të kryer nën mbrojtjen e forcave të shumta të policisë, pranë Paludan-it nuk u lejua të afrohet askush.

Personi Salwan Momika me origjinë irakiane, më 28 qershor dogji Kuranin nën mbrojtjen e policisë para xhamisë së Stockholmit në ditën e parë të Bajram Kurbanit.

Krahas vendeve islame si Türkiye, Iraku, Pakistani, Indonezia dhe Afganistani, ndaj ngjarjes u reagua edhe nga shumë shtete të tjera përfshirë SHBA-në dhe Rusinë.

Ndërsa Qeveria e Suedisë filloi një hetim lidhur me ngjarjen. Pas reagimeve, policia suedeze njoftoi se ndaj Momika i cili kreu aktin e djegies së Kuranit kanë bërë padi për veprën penale “provokim të popullit”.

Policia franceze ka kërkuar ndihmën e Izraelit për t’u përballur me protestat e vazhdueshme në të gjithë Francën pas vdekjes së një adoleshenti në një ndalesë trafiku.

Gazeta “The Israel Hayom” njoftoi se Komisioni i Policisë izraelite mori një faks nga policia franceze për të pyetur se si të menaxhonte krizën me të cilën po përballen.

Kërkesa franceze u zbulua nga nënkryetari i Divizionit të Operacioneve Policore, Shimon Nahmani, gjatë një seance dëgjimore të mbajtur nga Komiteti i Sigurisë Kombëtare të Knesset.

Sipas gazetës, komisioneri i policisë izraelite, Kobi Shabtai, urdhëroi departamentet e tij të inteligjencës dhe operacioneve të studiojnë protestat në Francë dhe reagimin e policisë para, gjatë dhe pas vdekjes së adoleshentit.

Nuk kishte asnjë koment nga autoritetet franceze mbi raportimin.

Franca është përfshirë nga një valë protestash të dhunshme që nga 27 qershori, kur një oficer policie qëlloi për vdekje 17-vjeçarin Nahel M. në periferinë e Parisit, Nanterre.

Protestuesit sulmuan forcat e policisë dhe dyqanet, duke hedhur gurë dhe kokteje molotov, si dhe duke u vënë flakën qindra makinave dhe ndërtesave.

Shumë vende arabe kanë dënuar djegien e librit të shenjtë, Kuranit, përpara një xhamie në kryeqytetin suedez Stockholm të mërkurën, transmeton Anadolu.

Ministria e Jashtme e Arabisë Saudite e kritikoi incidentin të mërkurën vonë, duke thënë se “këto akte të urryera dhe të përsëritura nuk mund të pranohen me asnjë justifikim dhe ato nxisin qartë urrejtje, përjashtim dhe racizëm”.

Ministria e Jashtme jordaneze tha gjithashtu se “djegia e Kuranit të Shenjtë është një akt i urrejtjes së rrezikshme dhe një manifestim i islamofobisë që nxit dhunën dhe fyerjen e feve dhe nuk mund të konsiderohet fare një formë e lirisë së shprehjes”.

Ministria e Jashtme palestineze theksoi se “sulmi ndaj Kuranit të Shenjtë nga një ekstremist urrejtës është një shprehje e urrejtjes dhe racizmit dhe një sulm flagrant ndaj vlerave të tolerancës, diversitetit, demokracisë dhe bashkëjetesës paqësore midis pasuesve të të gjitha feve”.

Gjithashtu, Parlamenti Arab përmes një deklaratë tha se ajo që ndodhi ishte “një akt nxitjeje që do të ndezte ndjenjat e muslimanëve në mbarë botën”, duke denoncuar qëndrimin e autoriteteve suedeze në këto “provokime”.

Të mërkurën, një person i identifikuar si Salwan Momika dogji një kopje të Kuranit nën mbrojtjen e policisë përpara xhamisë së Stockholmit.

Më 12 qershor, gjykata suedeze e apelit la në fuqi vendimin e gjykatës së ulët për të anuluar ndalimin e djegies së Kuranit, duke vendosur se policia nuk kishte baza ligjore për të parandaluar dy protesta për djegien e Kuranit në fillim të këtij viti.

Forcat turke të sigurisë arrestuan sot në Istanbul mbesën e Fetullah Gülenit, kreut të organizatës terroriste FETO.

Ekipet e inteligjencës pranë Policisë së Istanbulit kapën Asiye Gülenin dhe bashkëshortin e saj Mustafa Çamyar në lagjen Esenyurt.

Gjatë operacionit, policia sekuestroi dokumente organizative si dhe kartëmonedha të serisë “F” prej 1 dollari, tetë celularë, 12 karta SIM, dy laptopë, një numër të madh flash disqe, DVD dhe hard disqe.

FETO orkestroi tentativën për grusht shteti më 15 korrik 2016 në Türkiye, në të cilën u vranë 251 persona dhe u plagosën 2.734.

Kompania turke Baykar ka kryer me sukses testin e lëshimit të raketës së re, e cila është një mini raketë lundruese të mençur BAYRAKTAR KEMANKES.

Lëshimi testues i raketës me motor është kryer në kompleksin Kesan në Edirne, ndërkaq Baykar deklaroi se kjo është vazhdimësi e punës së suksesshme në fushën e zhvillimit të teknologjive të reja në fushën e industrisë së mbrojtjes.

Raketa u lëshua nga droni i Baykar, Bayraktar TB2 dhe 20 kilometra nga objektivi i synuar, të cilin e goditi.

KEMANKES për herë të parë u prezantua para publikut në TEKNOFEST, i cili u mbajt së fundmi në Istanbul dhe është një produkt i ri vendor turk i industrisë së mbrojtjes. Raketa e mençur u zhvillua për të rritur aftësinë sulmuese kundër objektivave strategjikë me dronin Bayraktar TB2 si dhe të gjithë avionët e tjerë Baykar.

Kjo raketë ka arritur aftësinë për të sulmuar elementët e armikut nga një distancë shumë më e madhe, edhe atë pa hyrë në zonën e rrezikut. Ai është i aftë të sulmojë një objektiv me përpunimin e pamjeve duke përdorur sistemin e vet dhe inteligjencën artificiale. Gjithashtu mund të operojë në mjedise të luftës elektronike me sistemet e tij GNSS kundër bllokimit.

Prodhimi i saj masiv pritet të bëhet deri në fund të këtij viti. Pesha totale e KEMANKES është 35 kilogramë, përfshirë kokën prej 6 kilogramësh. Raketa lëviz me anë të një motori reaktiv dhe distanca maksimale e saj do të jetë 250 kilometra.

Ish-kryeministri italian Silvio Berlusconi ka ndërruar jetë sot në moshën 86-vjeçare.

Berlusconi ishte shtruar në spital në San Raffaele të Milanos javën e kaluar për shkak të komplikimeve të lidhura me një leukemi kronike të panjohur më parë, njoftoi agjencia italiane e lajmeve ANSA.

Disa shtete individuale anëtare të NATO-s mund të konsiderojnë dislokimin e trupave në Ukrainë nëse anëtarët e tjerë ose aleanca në përgjithësi nuk i ofrojnë garanci të rëndësishme sigurie Kievit, veçanërisht gjatë samitit në korrik, sipas ish-shefit të NATO-s.

“Nëse NATO nuk mund të bie dakord për një rrugë të qartë përpara për Ukrainën, ekziston një mundësi e qartë që disa vende mund të ndërmarrin veprime individuale”, tha për të përditshmen britanike “The Guardian” ish-sekretari i përgjithshëm i NATO-s, Anders Rasmussen, i cili tani është këshilltar zyrtar i presidentit ukrainas, Volodymyr Zelenskyy.

Duke vizituar kryeqytete të ndryshme evropiane dhe Washingtonin përpara samitit në Vilnius të Lituanisë, Rasmussen ka theksuar rëndësinë e sigurimit të Ukrainës me garanci të shkruara sigurie, tha e përditshmja, duke përfshirë fusha si shkëmbimi i inteligjencës, mbështetja e trajnimit, prodhimi i municionit dhe furnizimin e vazhdueshëm me armë.

Rasmussen tha se ndërsa këto garanci janë thelbësore, ato nuk duhet të lënë në hije fokusin kryesor të Ukrainës në rrugën e saj drejt anëtarësimit në NATO.

“Ne e dimë se Polonia është shumë e angazhuar në ofrimin e ndihmës konkrete për Ukrainën, si dhe nuk do ta përjashtoja mundësinë që Polonia të angazhohej edhe më fort në këtë kontekst në baza kombëtare dhe të ndiqej nga shtetet baltike, ndoshta duke përfshirë mundësinë e trupave në terren”, tha ai.

Rasmussen ishte kryeministër i Danimarkës nga viti 2001 deri në 2009 dhe sekretar i përgjithshëm i NATO-s nga 2009 deri në 2014, kur ai u pasua nga Jen Stoltenberg, shefi aktual i aleancës.

Kreu i Këshillit Suprem Zgjedhor i Türkiyes (YSK), Ahmet Yener, ka bërë të ditur se Recep Tayyip Erdoğan është rizgjedhur president i Türkiyes në raundin e dytë të zgjedhjeve presidenciale.

Duke folur për gazetarët në kryeqytetin Ankara, kreu i YSK-së tha se në raundin e dytë të zgjedhjeve Erdoğan fitoi presidencën e Türkiyes kundrejt kandidatit të opozitës, Kemal Kılıçdaroğlu.

Sipas rezultateve jozyrtare, tha Yener, presidenti aktual turk fitoi garën zgjedhore me 52,14 për qind të votave, ndërsa Kılıçdaroğlu grumbulloi 47,86 për qind të votave. Ai shtoi se deri më tani në mbarë vendin janë hapur 99,43 për qind e kutive të votimit.

Mbi 64,1 milionë qytetarë turq kishin të mundësinë të shfrytëzojnë të drejtën e tyre të votës, duke përfshirë mbi 1,92 milion të cilët hodhën votën e tyre në qendrat e votimit jashtë shtetit.

Më 14 maj, në raundi ne parë, asnjë kandidat nuk arriti të sigurojë 50 për qind të votave të kërkuara, duke çuar zgjedhjet në raundin e dytë, megjithëse Erdoğan kryesoi me 49,52 për qind të votave.

Atë ditë, në raundin e parë, Aleanca e Popullit e udhëhequr nga Erdoğan gjithashtu fitoi një shumicë në parlamentin turk.