Aleksandros Diakopulos, këshilltari i sigurisë kombëtare i kryeministrit grek, mbrëmë ka dhënë dorëheqje për komentet e fundit të tij mbi anijen turke të shpimit Oruç Reis në Mesdheun Lindor..
Kryeministri Kyriakos Mitsotakis pranoi dorëheqjen e këshilltarit të sigurisë kombëtare, i cili tha se MTA Oruç Reis ka kryer kërkime në ndarjen kontinentale të Greqisë.
“Deklarata ime dje shkaktoi konfuzion dhe krijoi një problem për kryeministrin dhe qeverinë, diçka që nuk ishte kurrë qëllimi im”, tha Diakopulos në një deklaratë.
Deklarata e diskutueshme e këshilltarit të sigurisë kombëtare greke shkaktoi trazira në Greqi, pasi ishte në kundërshtim me qëndrimin zyrtar të Athinës se ka bllokuar anijen nga zona.
Partitë opozitare kritikuan qeverinë, duke e akuzuar për mashtrim të publikut.
Diakopulos më vonë u tërhoq nga deklarata, duke theksuar se fjalët e tij ishin keqkuptuar dhe se ai kishte dashur të thotë se anija kishte “provuar” të kryejë kërkime sizmike në ujërat greke, por se ishte ndaluar.
Në javën e parë të muajit gusht, Turqia rifilloi kërkimet në përpjekje të energjisë në Mesdheun Lindor, pasi Greqia dhe Egjipti nënshkruan një marrëveshje të diskutueshme detare të delimitimit.
Marrëveshja erdhi disa ditë pasi Ankaraja tha se do të prolongojë kërkimet e saj të naftës dhe gazit si një gjest i vullnetit të mirë.
Por pasi e shpalli marrëveshjen greko-egjiptiane “të pavlefshme”, Turqia autorizoi anijen Oruç Reis të vazhdojë aktivitetet në një zonë brenda ndarjes së saj kontinentale siç u deklarua në Kombet e Bashkuara (OKB).
Anija do të vazhdojë misionin e saj dy-javor deri më 23 gusht, së bashku me anijet Cengiz Han dhe Ataman.
Ankaraja ka kundërshtuar vazhdimisht përpjekjet e Greqisë për të shpallur një zonë ekskluzive ekonomike bazuar në ishujt e vegjël pranë brigjeve turke, duke shkelur interesat e Turqisë, vendit me vijën më të gjatë bregdetare në Mesdhe.
Turqia po ashtu ka theksuar se burimet e energjisë pranë Qipros duhet të ndahen në mënyrë të drejtë midis administratës qipriote greke të Qipros Jugore dhe Republikës Turke të Qipros Veriore (TRNC), e cila ka lëshuar një licencë për Turkish Petroleum.
Presidenti turk, Recep Tayyip Erdoğan, tha se e vetmja zgjidhje për mosmarrëveshjen do të ishte ajo përmes dialogut dhe negociatave, duke i bërë thirrje Athinës të respektojë të drejtat e Turqisë.