Presidenti i SHBA-së, Donald Trump, është shprehur se po shqyrton një operacion të përbashkët me Iranin për të siguruar Ngushticën e Hormuzit pas një armëpushimi të saposhpallur me Teheranin, transmeton Anadolu.
“Po mendojmë ta bëjmë si një sipërmarrje të përbashkët. Është një mënyrë për ta siguruar atë, duke e siguruar edhe nga shumë njerëz të tjerë”, tha Trump për ABC News pasi njoftoi një armëpushim dyjavor.
I pyetur nëse do të lejojë Iranin të vendosë taksa në ngushticë, Trump tha se kjo është “një gjë e bukur”.
Trump gjithashtu përjashtoi çdo të drejtë të pasurimit të uraniumit për Iranin.
“Nuk do të ketë pasurim”, tha ai.
Ai shtoi se forcat amerikane nuk do të tërhiqen nga rajoni, duke shtuar se ato do të mbeten për të zbatuar çdo marrëveshje të ardhshme.
Trump tha se pret që bisedimet për paqe të fillojnë që të premten dhe parashikon që ato do të lëvizin shpejt. Ai gjithashtu konfirmoi se Kina luajti një rol të rëndësishëm në lehtësimin e komunikimeve me Iranin.
Ngushtica e Hormuzit, një rrugë kyç globale e tranzitit të naftës, përmes së cilës zakonisht kalojnë afër 20 milionë fuçi nafte për çdo ditë, u ndërpre në mënyrë efektive nga Irani pas nisjes së ofensivës së SHBA-së dhe Izraelit më 28 shkurt.
Kjo ndërprerje rriti çmimet globale të naftës dhe tronditi tregjet financiare. Irani pranoi të rihapë rrugën ujore sipas kushteve të armëpushimit të shpallura dje, më pak se dy orë para se të skadonte afati i presidentit Trump.