Emisari special i presidentit të SHBA-ve, Donald Trump për dialogun Kosovë-Serbi, Richard Grenell, ka bërë të ditur se liderët e Kosovës dhe Serbisë do të takohen më 2 shtator në Washington për bisedime.
Grenell këtë e ka bërë të ditur nëpërmjet një shkrimi në rrjetet sociale.
“Jemi të lumtur të njoftojmë se liderët e Kosovës dhe të Serbisë do të takohen në Shtëpinë e Bardhë, më 2 shtator për të biseduar”, ka shkruar ambasadori Grenell.
Një takim në Washington mes krerëve të Kosovës e Serbisë ishte paraparë për 27 qershor, por ishte anuluar pas ngritjes së aktakuzës nga Gjykata Speciale në Hagë ndaj presidentit Hashim Thaçi.
Takimin e 2 shtatorit e ka përshëndetur ambasadorja e Kosovës në SHBA, Vlora Çitaku.
