Të hënën, Rusia thirri ambasadorin gjerman në Moskë, Alexander Lambsdorff, në lidhje me bisedimet ushtarake të zbuluara mes oficerëve gjermanë javën e kaluar, raporton Anadolu.
Të hënën, Lambsdorff hyri në ndërtesën e Ministrisë së Jashtme dhe më pas u largua nga ndërtesa pa dhënë asnjë deklaratë për media.
Ministria e Punëve të Jashtme ruse ende nuk ka dalë me ndonjë deklaratë për këtë çështje.
Lambsdorff u ftua pasi media ruse publikoi një përgjim 38-minutësh të një bisede midis oficerëve gjermanë të premten, në të cilën ata diskutuan mundësinë teorike që Ukraina të përdorë raketat gjermane Taurus.
Përgjimi gjithashtu përfshin biseda rreth goditjes së mundshme të Urës së Kerçit nga Ukraina që lidh Rusinë kontinentale dhe Krimenë, të cilën Moska e aneksoi ilegalisht në vitin 2014.
Gjatë vizitës së tij në Romë, kancelari gjerman Olaf Scholz premtoi se do të sqaronte së shpejti situatën, të cilën ai e përshkroi si “një çështje shumë serioze”.
Zëdhënësi i Kremlinit, Dmitry Peskov konfirmoi se Lambsdorff ishte ftuar, duke u thënë gazetarëve në një konferencë për media se rrjedhjet sugjeronin se planet e Berlinit për të sulmuar Rusinë po diskutoheshin “në mënyrë thelbësore dhe konkrete”.
Ai gjithashtu shprehu shpresën e tij për të marrë disa rezultate nga paralajmërimet për hetime nga kancelari Scholz.