Byroja e Kuvendit të Shqipërisë, ka marrë sot vendimin për të përjashtuar me 10 ditë nga punimet e parlamentit disa deputetë të opozitës lidhur me tensionet gjatë seancës së fundit parlamentare për zgjedhjen e kryeprokurores së përkohshme, raporton (AA).
Deputetët e përjashtuar me 10 ditë janë, Endri Hasa, Flamur Noka, Bardh Spahia, Ervin Salianji (të Partisë Demokratike), Monika Kryemadhi dhe Endrit Brahimllari (të Partisë Lëvizja Socialiste për Integrim). Ndërkohë për deputetin e Partisë Socialiste, Bujar Çela dhe deputeten e Partisë Lëvizja Socialiste për Integrim, Kejdi Mehmetaj, u mor vendimi për përjashtimin e tyre për 5 ditë nga punimet e Parlamentit.
Deputeti i Partisë Socialiste të Shqipërisë, Ervin Bushati, pas përfundimit të mbledhjes, në një prononcim për mediat tha se “veprime të tilla cenojnë integritetin e punës së Parlamentit në një kohë që Shqipëria është pranë integrimit në BE”. “Akte të dënueshme dhune, apo pengimi i të drejtës së votës së çdo deputetit janë të ndëshkueshme. Është e papranueshme që veprime apo mosveprime të tilla të cenojnë sadopak integritetin e punës së Parlamentit të Shqipërisë, aq më tepër në momentin që Shqipëria është kaq pranë integrimit në Evropë”, tha Bushati.
Ndërsa kryetarja e partisë opozitare, Partisë Lëvizja Socialiste për Integrim, Monika Kryemadhi, theksoi pas mbledhjes se “Mbrojtja është jo vetëm morale, por edhe ligjore. Deputetët në Kuvendin e Shqipërisë kanë bërë një betim që do të respektojnë Kushtetutën dhe ligjet. Veprimi ynë ka qenë legjitim për mos lejimin e shkeljes së Kushtetutës.”
Që në nisje të saj, mbledhja e Byrosë së Kuvendit të Shqipërisë u përfshi nga debate mes deputetëve të pozitës dhe opozitës, pasi këto të fundit kërkuan që mbledhja të zhvillohej me praninë e medias, por kërkesë u hodh poshtë nga shumica.
Ndërkohë lidhur me tensionet në protestën e opozitës më 18 dhjetor, 10 deputetë procedohen në gjendje të lirë, sipas policisë për “prishje të rendit dhe kundërshtim të Policisë.”
Nga ana tjetër lidhur me incidentet në Kuvend ku u hedhën tymuese dhe pati përplasje mes deputetëve dhe punonjësve të Gardës së Shqipërisë, Partia Demokratike e Shqipërisë ka depozituar në Prokurorinë e Rrethit Gjyqësor Tiranë një kallëzim penal kundër kryetarit të Kuvendit të Shqipërisë, Gramoz Ruçi.
Kujtojmë se mes tensioneve në seancën parlamentare të 18 dhjetorit, Arta Marku është zgjedhur nga Kuvendi i Shqipërisë, në postin e kryeprokurores së përkohshme. Opozita parlamentare e Shqipërisë, e kryesuar nga Partia Demokratike (PD) ishte kundër këtij votimi, duke mbajtur një protestë përpara Kuvendit të Shqipërisë në të cilën pati edhe përplasje mes protestuesve dhe policisë.