Kryetari i Kuvendit të Kosovës, Glauk Konjufca, ka pritur në takim ambasadorin turk në Kosovë, Çağrı Sakar, i cili e ka përgëzuar për detyrën e re.
Siç bën të ditur komunikata nga kuvendi, në takim është biseduar për zhvillimet politike, situatën me pandeminë, si dhe përpjekjet e Kosovës për sigurimin e vaksinave anti-COVID.
“Janë shqyrtuar edhe mundësitë e rritjes së bashkëpunimit në sferën e ekonomisë, këmbimit tregtar dhe zhvillimit të diplomacisë parlamentare”, shkruan njoftimi.
Tutje, bëhet e ditur se Konjufca e ka informuar ambasadorin turk për prioritetet e këtij mandati dhe ka përmendur dinamizmin e punës së organit legjislativ, reformën zgjedhore, si dhe reformat në sistemin e drejtësisë.
Dje Sakar u prit edhe nga kryeministri i Kosovës, Albin Kurti, ku po ashtu diskutuan për “mundësinë e eliminimit të disa barrierave ekonomike që do të lehtësonin investimet dhe shkëmbimet”.