Kina tha sot se lidhjet e saj ekonomike me Kanadanë nuk synojnë asnjë palë të tretë, por janë të favorshme për paqen botërore, pasi SHBA-ja kërcënoi me tarifa prej 100 për qind Otavën për çdo pakt tregtar me Pekinin.
“Pekini beson se përmes bashkëpunimit vendet duhet t’u qasen marrëdhënieve shtet-me-shtet në frymën fito-fito ndaj të dyja palëve, në vend të mentalitetit të shumës zero, në vend të konfrontimit”, u tha gazetarëve në kryeqytetin kinez zëdhënësi i Ministrisë së Jashtme kineze, Guo Jiakun.
Presidenti i SHBA-së, Donald Trump shkroi të shtunën në platformën e tij të mediave sociale Truth Social se: “Nëse Kanadaja bën marrëveshje me Kinën, ajo do të goditet menjëherë me një tarifë prej 100 për qind kundër të gjitha mallrave dhe produkteve kanadeze që hyjnë në SHBA”.
Megjithatë, Guo tha se “Kina dhe Kanadaja kanë krijuar një lloj të ri partneriteti strategjik dhe kanë bërë disa marrëveshje specifike për trajtimin e duhur të çështjeve ekonomike dhe tregtare midis dy vendeve”.
Sipas tij, kjo pasqyron frymën e barazisë, hapjes, përfshirjes, bashkëpunimit paqësor, ndarjes së përbashkët dhe përfitimit të ndërsjellë.
Kryeministri kanadez Mark Carney zhvilloi vizitë zyrtare në Kinë në fillim të këtij muaji, të cilën presidenti kinez Xi Jinping e përshkroi si një “pikë kthese” në marrëdhëniet dypalëshe. Ai potencoi se lidhjet e Kanadasë me Kinën janë “më të parashikueshme” sesa ato me fqinjin e saj jugor nën Trumpin.
Kanadaja dhe Kina vendosën marrëdhënie në vitin 1970 dhe vëllimi i tregtisë dypalëshe ishte 67 miliardë dollarë në fund të vitit 2024.