Ministri i Punëve të Jashtme të Republikës së Turqisë Mevlüt Çavusoglu, pas takimit me zyrtarët e Bashkimit Evropian në Maltë, deklaroi se BE-ja i ka kuptuar gabimet e saj ndaj Turqisë, raporton (AA).
“Sot kam parë një atmosferë pozitive, por gjithashtu vërejta se kanë kuptuar edhe gabimet e tyre. Sigurisht, nëse janë të sinqertë”, tha Çavusoglu, i cili në Valletta u takua me Përfaqësuesen e Lartë të Bashkimit Evropian për Politikë të Jashtme dhe të Sigurisë Federica Mogherini, Komisionerin për zgjerimit Johannes Hahn dhe ministrin e Jashtëm gjerman Sigmar Gabriel.
Pas takimit joformal të ministrave të Jashtëm të BE-së (Gymnich), Çavusoglu për AA konfirmoi se ministrat e Jashtëm të BE-së në mbledhjen e sotme kanë vendosur për vazhdimin e dialogut dhe bashkëpunimit me Turqinë.
Çavusoglu ka deklaruar se tani edhe personalisht i ka përcjellë mesazh shumë të qartë BE-së: “Nëse doni dialog dhe bashkëpunim, ato duhet të jenë të sinqerta dhe reale, duhet të jenë larg standardeve të dyfishta”.
Ministri turk edhe një herë theksoi se vendi i tij është i gatshëm që të hapë të gjithë kapitujt e bisedimeve me BE-në.
“Problemi ynë nuk është teknik. Pengesat që janë para nesh janë politike”, ka thënë Çavusoglu.
“Sot kam mundur të vërej se ata kanë nxjerrë leksionet nga qëndrimet dhe gabimet e tyre të mëparshme. Shpresoj të jenë të sinqertë. Mund të vëreja një atmosferë pozitive. Por, nëse rezulton se nuk janë të sinqertë, atmosfera e njëjtë mund menjëherë të ndërpritet që nesër”.
Mogherini theksoi se Turqia nuk është vetëm një vend kandidat për anëtarësim në Bashkimin Evropian, por edhe një partner strategjik i BE-së.
“Nga perspektiva e BE-së, mund të themi se negociatat për anëtarësim do të vazhdojnë. Nuk janë të ngrira e as të mbyllura”, tha ndër të tjera Mogherini.