Bashkimi Evropian njoftoi sot herët se do të vendosë sanksione shtesë ndaj individëve dhe kompanive turke në vazhdën e aktiviteteve të Turqisë në Mesdheun Lindor.
Ndërsa Samiti i Udhëheqësve të BE-së në Bruksel vazhdoi, Unioni ndau pjesën përkatëse të deklaratës përfundimtare mbi Turqinë ndërsa ata arritën një konsensus pas bisedimeve të gjata disa orëshe.
Deklarata pretendon se Turqia u përfshi në veprime dhe provokime të njëanshme dhe përshkallëzoi retorikën e saj kundër BE-së.
BE-ja potencoi tërheqjen e anijes kërkimore turke “Oruç Reis” dhe këmbënguli në de-përshkallëzim të qëndrueshëm për të ndjekur rinisjen e hershme dhe vazhdimin e qetë të bisedimeve të drejtpërdrejta lidhur me kërkimet midis Greqisë dhe Turqisë.
“Këshilli Evropian riafirmon interesin strategjik të BE-së në zhvillimin e një marrëdhënieje bashkëpunuese dhe reciproke të dobishme me Turqinë. Oferta e një axhende pozitive BE-Turqi mbetet në tryezë, me kusht që Turqia të tregojë gatishmëri për të promovuar një partneritet të mirëfilltë me Unionin dhe vendet e saj anëtare dhe për të zgjidhur mosmarrëveshjet përmes dialogut dhe në përputhje me ligjin ndërkombëtar”, thuhet më tej.
Duke theksuar rëndësinë e mbajtjes hapur të kanaleve të komunikimit midis BE-së dhe Turqisë, gjithashtu u theksua se BE-ja do të vazhdojë të sigurojë ndihmë financiare për sirianët në Turqi.
Turqia aktualisht strehon 4 milionë refugjatë sirianë, më shumë se çdo vend tjetër në botë.
BE-ja fton këshillin të miratojë lista shtesë
BE-ja ftoi këshillin të miratojë lista shtesë bazuar në vendimin e tij më 11 nëntor 2019 në lidhje me masat kufizuese në funksion të “veprimtarive të paautorizuara të shpimit” të Turqisë në Mesdheun Lindor.
Ajo gjithashtu ftoi Përfaqësuesin e Lartë të BE-së, Josep Borrell dhe komisionin të paraqesin një raport mbi gjendjen në lidhje me marrëdhëniet politike, ekonomike dhe tregtare BE-Turqi dhe mbi instrumentet dhe opsionet se si të veprohet.
Deklarata dënoi hapjen e një pjese të qytetit Maras, i njohur gjithashtu në Greqisht si Varosha dhe argumentoi se duhet të respektohen rezolutat e Këshillit të Sigurimit të OKB-së.
Poashtu deklarata kërkon nga Borrell që të çojë përpara propozimin për një konferencë shumëpalëshe mbi Mesdheun Lindor.
“BE-ja do të kërkojë të koordinojë çështjet që lidhen me Turqinë dhe situatën në Mesdheun Lindor me SHBA-të”, shtoi ajo.
Udhëheqësit e BE-së u mblodhën në Bruksel të enjten për diskutimet dy-ditëshe mbi buxhetin e BE-së dhe COVID-19 si dhe lidhjet dhe marrëdhëniet transatlantike me Turqinë.
Turqia, e cila ka vijën bregdetare më të gjatë kontinentale në Mesdheun Lindor, ka hedhur poshtë pretendimet e kufirit detar të Greqisë dhe administratës qipriote greke, duke theksuar se këto pretendime të tepërta shkelin të drejtat sovrane të Turqisë dhe turqve qipriotë.
Ankaraja ka dërguar disa anije kërkimore në muajt e fundit për të hulumtuar burimet e energjisë në Mesdheun Lindor, duke mbrojtur të drejtat e saj në rajon si dhe ato të Republikës Turke të Qipros Veriore.
Udhëheqësit turq kanë theksuar vazhdimisht se Ankaraja është në favor të zgjidhjes së të gjitha problemeve të pazgjidhura në rajon përmes ligjit ndërkombëtar, marrëdhënieve të fqinjësisë së mirë, dialogut dhe bisedimeve.