Tarifa prej 84 për qind e Kinës në hakmarrje ndaj rritjes së tarifave të presidentit të SHBA-së, Donald Trump, mbi importet kineze, ka hyrë në fuqi mes një lufte tregtare në përshkallëzim midis dy ekonomive globale.
Në një seri rritjesh të përplasjeve, Kina njoftoi tarifa reciproke prej 34 për qind në përgjigje të raundit të parë të tarifave të Trump, duke hedhur poshtë paralajmërimin e Trumpit për t’i tërhequr ato ose ai do t’i rrisë përsëri ato amerikane.
Ndaj rritjes së tarifave nga Trumpi në 104 për qind kundër importeve kineze, Pekini u përgjigj me një tarifë prej 84 për qind mbi produktet amerikane.
Dje, Trump i rriti tarifat më tej në 125 për qind.
Pekini po ashtu ka vendosur 18 kompani amerikane në listat e kufizimeve tregtare, së bashku me kundërmasa të tjera pasi nuk ka shenja të një pauze të menjëhershme në luftën tregtare midis dy vendeve.
Në një përpjekje të qartë për të lehtësuar problemet e tarifave të SHBA-së, Kina siç duket po i afrohet kombeve të tjera për të mbështetur marrëveshjet tregtare.
Javën e ardhshme, presidenti kinez, Xi Jinping, do të nisë vizitën e tij në vendet e Azisë Juglindore, përfshirë Malajzinë.
Kina dhe Bashkimi Evropian (BE), sipas Ministrisë së Tregtisë të Pekinit, gjithashtu u zotuan se do mbështesin sistemin tregtar shumëpalësh me Organizatën Botërore të Tregtisë (WTO) në thelbin e tij.
Siç raportoi agjencia shtetërore kineze e lajmeve Xinhua, marrëveshja u arrit gjatë një takimi virtual midis ministrit kinez të Tregtisë, Wang Wentao dhe komisarit evropian për Tregtinë dhe Sigurinë Ekonomike, Marosh Shefçoviq.
Të dy diskutuan çështje të ndryshme, përfshirë forcimin e bashkëpunimit ekonomik dhe tregtar Kinë-BE dhe përgjigjet ndaj vendosjes së të ashtuquajturave “tarifa reciproke” të SHBA-së.
Shefçoviq tha se tarifat e SHBA-së kanë ndikuar rëndë në tregtinë ndërkombëtare dhe se BE-ja është e gatshme të punojë me anëtarët e tjerë të WTO-së, përfshirë Kinën, për të siguruar funksionimin normal të tregtisë ndërkombëtare.
