Nga Blendi Gashi
Fill pasi Komisioni Evropian lëshoi rekomandimin pozitiv për liberalizimin e vizave ndaj shtetasve kosovar, nëpër sportelet e ia behën me qindra qytetarë për të marrë pasoporta biometrike. Prej ditësh, në këto zyra është një rradhe e madhe e atyre që, me ç’duket, duan ta shijojnë menjëherë lirinë e lëvizjes drejt zonës Shengen, ndryshe drejt Europës.
Vetëm për një javë, 10227 aplikime për pasaporta biometrike
Ministria e Punëve të Brendshme pranon se numri i qytetarëve që duan të pajisen me pasaportë biometrike është rritur dukshëm pas rekomandimit pozitiv për liberaizimin e vizave, por thotë se nuk ka frikë nga fluksi i madh i kërkuesve, dhe se kërkesave të tyre do t’u dilet lehtë përballë.
Ministria e Punëve të Brendshme që drejtohet nga ministri Skender Hyseni ka bërë të ditur për portalin tesheshi.com se vetëm për një javë numri i aplikimeve për pasaporta biometrike ka arritur në 10227.
“Prej datës 03.05.2016 deri më 10.05.2016 aplikime për pasaporta biometrike janë: 10227”, thuhet në përgjigjet e kësaj ministrie për tesheshi.com .
Krahasuar me katër mujorin e parë të vitit të kaluar, numri i kërkesave për këtë vit është rritur në më shumë se 600 të tilla.
“Janar -Prill 2015 aplikime për pasaporta biometrike kanë qenë: 47338; Janar -Prill 2016 aplikime për pasaporta biometrike kanë qenë: 48000”, thuhet në përgjigjen e MPB-së, për tesheshi.com.
Ministria e Brendshme thotë se ka mjaftueshëm pasaporta për të gjithë qytetarët e Kosovës.
Duan të udhëtojnë te fëmijët që i kanë në mërgim
Murat Bajra, 63-vjeçar nga Prishtina, thotë se është zgjuar në orët e hershme të mëngjesit për t’i ikur tollovisë dhe për të aplikuar për pasaportë biometrike .
Ai për tesheshi.com ka treguar se fëmijët i jetojnë në Gjermani dhe dëshiron t’i rregullojë dokumentet që të mos ketë probleme.
“Unë i kam dy djem në Gjermani. Edhe pse kam qenë më parë për vizitë te fëmijët, po aplikoj për pasaportë biometrike që të rregulloj dokumetet dhe të mos kem më probleme si herave të kaluara. Pasi të merret vendimi përfundimtar që të udhëtojmë pa viza, atëherë mua do të më lehtësohet puna, pasi nuk do të më duhet të pres nëpër ambasada për vizë”, ka thënë Bajra.
Do të ketë ikje masive të qytetarëve drejt vendeve të BE-së
Analisti politik, Nexhmedin Spahiu thotë se fluksi i madh i qytetarëve për paisje me pasaporta biometrike është një sinjal që tregon se do të ketë ikje masive të kosovarëve drejt vendeve perëndimore në momentin që zyrtarisht jepet drita e gjelbërt për lëvizjen e lirë.
“Institucionet, shoqëria civile, intelektualet duhet të përgatitet për ikjen masive të qytetarëve nga vend. Ikja e tyre drejt vendeve të BE-së mund të ketë pasoja katastrofike për shoqërinë kosovare”, thotë Spahiu për tesheshi.com.
Austria, Belgjika, Çekia, Danimarka, Estonai, Finlanda, Gjermania, Greqia, Hungaria, Islanda, Italia, Letonia, Franca, Lihtenshtajni, Lituania, Luksemburgu, Malta, Holanda, Norvegjia, Polonia, Portugalalia, Sllovakia, Sllovenai, Spanja, Suedia dhe Zvicra janë shtetet në të cilat kosovarët mund të udhëtojnë pa viza, ndërkaq numri i qyetarëve të cilët synojnë t’ua mësyjnë këtyre vendeve është mjaft i madh.
/tesheshi.com/
