Presidenti i Turqisë, Recep Tayyip Erdogan, shprehu kritika të ashpra për trajtimin e autoriteteve greke ndaj refugjatëve në kufirin turko-grek të cilët dëshirojnë të arrijnë në vendet evropiane.
Duke folur në një eveniment në Stamboll me rastin e 8 Marsit-Ditës Ndërkombëtare të Gruas, presidenti turk tha se askush nuk po e ngre zërin kundër “akteve jonjerëzore” të Greqisë ndaj azilkërkuesve.
“Askush nuk po e dënon persekutimin e grave refugjate në kufirin turko-grek, të cilat qëllohen ose rrahen”, tha Erdogan.
Presidenti i Turqisë Erdogan tha se të hënën do të takohet në Belgjikë me zyrtarë të BE-së për të diskutuar situatën e azilkërkuesve në kufirin turko-grek.
Përkundër të gjitha grave dhe fëmijëve që kanë humbur jetën në Siri, tha Erdogan, kësaj çështjeje nuk i është kushtuar vëmendja e nevojshme.
Ai tha se ekziston heshtje përballë vështirësive, abuzimit dhe vrasjes së grave në gjithë globin dhe kritikoi “hipokrizinë” e botës e cila feston Ditën Ndërkombëtare të Gruas.
“Është hipokrizi që bota me ndërgjegjen e saj të ngurtësuar feston 8 Marsin, Ditën Ndërkombëtare të Gruas”, deklaroi presidenti turk.
Duke folur për krizën në Siri, ai theksoi se qëllimi i Turqisë asnjëherë nuk ka qenë pushtimi ose aneksimi i territoreve siriane.
