Rreth 312.000 sirianë janë kthyer në shtëpitë e tyre pas operacioneve anti-terroriste të Turqisë në Sirinë veriore, tha sot ministri i Brendshëm i Turqisë, Süleyman Soylu, raporton Anadolu (AA).
Duke folur në kryeqytetin turk Ankara, Soylu tha se: “311.968 sirianë janë kthyer në shtëpitë e tyre pas operacioneve ‘Dega e Ullirit’ dhe ‘Mburoja e Eufratit’ që ofruan një atmosferë qetësie dhe paqeje”.
Që nga viti 2016, operacionet e Turqisë “Mburoja e Eufratit” dhe “Dega e Ullirit” në Sirinë veriore kanë çliruar rajonin nga terroristët e YPG/PKK dhe DEASH-it, duke përfshirë Al-Bab, Afrin dhe Azaz, duke u bërë të mundur sirianëve që u larguan nga dhuna, që ata të kthehen në shtëpi.
Siria sapo ka filluar të dalë nga një konflikt shkatërrues që filloi në vitin 2011 kur regjimi i Bashar al-Assad goditi demonstruesit me një egërsi të papritur.
Qindra mijëra civilë janë vrarë ose zhvendosur gjatë konfliktit, kryesisht nga sulmet ajrore të regjimit që synojnë zonat e kontrolluara nga opozita.
Soylu gjithashtu tha se Turqia pret mbi 3.6 milionë sirianë që kanë statusin e mbrojtjes ndërkombëtare.
Turqia që nga fillimi i luftës civile siriane ka shpenzuar më shumë se 32 miliardë dollarë nga burimet e saj kombëtare për të ndihmuar dhe strehuar refugjatët.
Ministri i Brendshëm gjithashtu përditësoi shifrat për migrantët e parregullt që u ndaluan në operacionet mbarëkombëtare këtë vit.
Rreth 6,523 migrantë të parregullt u ndaluan në të gjithë Turqinë në pesë javët e para të vitit 2019, shtoi ai.