Presidenti amerikan, Donald Trump me qëllim “parandalimin e emigrantëve ilegalë” dhe “rritjen e sigurisë kufitare” njoftoi se ka nënshkruar dekretin i cili parashikon ndërtimin e murit në kufirin me Meksikën.
Trump i cili ka folur gjatë vizitës së kryer në Departamentin e Sigurisë së Brendshme ka njoftuar se ka nënshkruar dekretin presidencial në lidhje me “ndërtimin e murit në kufirin me Meksikën”, çështje kjo e cila diskutohet prej muajsh në opinion amerikan.
Duke theksuar se me murin që do të ndërtohet në kufirin SHBA-Meksikë synohet parandalimi i emigrantëve ilegalë, trafikimi i qenieve njerëzore dhe drogës, Trump është shprehur se “Amerika që nga dita e sotme rimerr kontrollin e kufijve të saj.”
Ai ka shtuar se ndërtimi i murit i cili parashikohet të jetë afërsisht me një gjatësi 3.200 km do të financohet fillimisht nga buxheti i qeverisë federale dhe ka vënë në dukje se këto para do të mblidhen nga qeveria e Meksikës.
Për murin i cili planifikohet të fillojë së ndërtuar brenda disa muajve nuk është bërë ndonjë deklaratë në lidhje me afatin e përfundimit të tij.
Në një deklaratë në lidhje me këtë çështje edhe zëdhënësi i Shtëpisë së Bardhë, Sean Spiceer, është shprehur se “Meksika në një mënyrë apo tjetër do ti paguajë këto para.”
Në dy deklarata të ndryshme me shkrim nga Shtëpia e Bardhë u theksua se Trump ka nënshkruar dekretet në lidhje me “murin në kufirin me Meksikën” dhe “me qytetet që mbrojnë emigrantët ilegalë.”
Me dekretin e dytë Trump parashikon të kufizojë buxhetin federal për rajonet që drejtohen nga guvernatorët demokratë të cilët në përgjithësi refuzojnë propozimin për largimin nga SHBA-ja të emigrantëve që ndodhen ilegalisht në vend.
Ndërsa presidenti i Meksikës, Enrique Pena Nieto, më parë shumë herë kishte deklaruar se nuk do të kryenin asnjë pagesë për murin që Trump ka planifikuar të ndërtojë në kufirin mes dy vendeve.
